विद्यार्थी सहुलियत खै -

बेसीशहर मंसिर १७
- यातायात ब्यवसायीले विद्यार्थी सहुलियत नदिएको र सहुलियत माग्ने विद्यार्थीलाई अभद्र ब्यवहार गरेका भन्दै तीन विद्यार्थी संगठनले सोमबार दिउसो १ बजेबाट करीब ३ घण्टा डुम्रे बेसीशहर सडक खण्डमा चक्काजाम गरे ।
अनेरास्ववियू क्रान्तिकारी, नेविसंघ र अनेरास्ववियूले विद्यार्थी सहुलित माग्ने विद्यार्थीलाई एक बसका कण्डक्टरले लिभरले कुट्ने कोशिस गरेकाले आन्दोलन गरिएको बताएका छन् । नेविसंघ लमजुङका अध्यक्ष बृषबहादुर गुरुङले पटक पटक विद्यार्थी सहुलियत दिने ब्यवसायीहरुले प्रतिवद्धता जनाए पनि ब्यवहारमा कार्यान्वयन नभएको र उल्टै सहुलियत माग्ने विद्यार्थीलाई कुट्न खोजे पछि बाध्य भएर आन्दोलन गरीएको बताए ।
यातायातमा विद्यार्थी सहुलियतको विषयमा गत कार्तिक २९ गते पनि विद्यार्थीहरुले डुम्रे बेसीशहर सडक खण्ड अबरुद्ध पारेका थिए । पछि यातायात ब्यवसायीले माग पुरा गर्ने प्रतिबद्धता जनाएपछि आन्दोलन फिर्ता भएको थियो ।