उपचार अभावमा आत्महत्या

बेसीशहर फागुन ११

औषधी उपचार गर्न नसकेपछि रुकुममा सामूहिक आत्महत्या भएको खबर सेलाउन नपाउँदै लमजुङका एक युवकले पनि आर्थिक अभावमा उपचार गर्न नसकी आत्महत्या गरेको समाचार प्रकासमा आएको छ ।

लमजुङको भुलभुले गाउँ विकास समिति वडा नम्बर १, बडागाउँ निवासी २३ बर्षा सुरज परियारले आफ्नो उपचार हुन नसकेपछि निराश भइ आइतबार राती आत्महत्या गरेका हुन् । उनको पारिवारिक श्रोतका अनुसार गत जेठमा रोजगारका लागि मलेसिया पुगेका परियार विरामी परेपछि घर फर्केका र घर आएदेखि नै निकै चिन्तित हुने गरेका थिए ।

उनको उपचारमा ठूलो खर्च आउने देखेपछि रोजगारदाता कम्पनीले उनलाई गत माघ १९ गते स्वदेश फर्काइ दिएको थियो । माघ २६ गते घर आइपुगेका परियार बेसीशहरको सामुदायिक अस्पतालमा उपचार गराउन भर्ना भए । तर अस्पतालले यहाँ उपचार हुन नसक्ने जानकारी गराएपछि उनी भरतपुरस्थित वीपी कोइराला क्यान्सर अस्पताल पुगे । त्यहाँ पनि रोग निको नहुने संकेत देखेपछि उनी निराश भई घर फर्केका थिए । मृतक परियारका श्रीमती, चार महिनाको एक छोरा र बृद्ध बाबु हुनुहुन्छ ।