बेसीशहर चैत्र १७
एकीकृत नेकपा माओवादी निकटको तमु राष्ट्रिय मुक्ति मोर्चाले बन्द गर्ने चेतावनी दिएपछि गत फागुन ३ गतेबाट बन्द रहँदै आएको ६ सय मेघावाट क्षमता रहेको माथिल्लो मर्स्याङ्दी -२ का प्राविधिक तथा कर्मचारीलाई हटाइएको छ ।
आयोजनाको डिपीआर तयार गरिरहेको हिमताल हाइड्रोपावर कम्पनीले तत्काल काम शुरु गर्न सहमति नबन्ने संकेत नदेखिए पछि त्यहाँ कार्यरत ८० जना प्राविधिक र कर्मचारी हटाएको हो । मनाङको तालमा बाँध बाधेर, लमजुङको स्याँगेमा विद्युत गृह निर्माण गरी ६ सय मेघावाट विद्युत निकाल्ने लक्ष्यका साथ आयोजनाको डिपीआर तयार हुँदै गर्दा मोर्चाले आयोजना बन्द गराएको थियो । आयोजना सुचारु गर्न विभिन्न चरणमा भएका वार्ताहरु विना निष्कर्षटुंगिएपछि हिमतालले काम बन्द गरेको छ ।
एकीकृत नेकपा माओवादी र तमु मुक्ति मोर्चाले प्राकृतिक श्रोत माथि स्थानीय आदिवासीको अग्राधिकारको सुनिश्चितता नभएसम्म आयोजनाको काम चल्न नदिने बताउँदै आएको छ । सो संस्थाका अध्यक्ष तथा सभासद अमर तमुले हिमताल कम्पनीको ८० प्रतिशत शेयर भारतको जीएमआर कम्पनीले खरीद गरेको र माथिल्लो मर्स्याङदीबाट उत्पादित विद्युत सिधै भारत लैजाने तयारी भइरहेको गोप्य सूचनाका आधारमा आयोजना बन्द गराएको बताउँदै आउनुभएको छ ।
तर अन्य राजनीतिक दलले भने आयोजनाबाट उत्पादित विद्युत खरीद विक्रीको सम्झौता नै नभएको अवस्थामा विना कुनै आधार आयोजना बन्द नगरी सुचारु गर्न आग्रह गर्दै आएका छन् । तर माओवादी र तमु मुक्ति मोर्चाले भने कुनै पनि हालतमा आयोजना चल्न नदिने बताउँदै आएका छन् । माओवादी नेताहरुले बल प्रयोग गरेर आयोजना सञ्चालन गर्न खोजिए आफ्नो तर्फाट पनि बल प्रयोग हुने चेतावनी दिएका छन् ।
No comments:
Post a Comment